لاش تحزن يا قلب؟
ياك غير دنيا!!!!
فين مشات الخاطر؟؟
و الضحكة الصافية؟
أش بدلك؟ أش خلا العقل سارح…
… و العين ساهية؟
يا قلب أش جرالك؟؟
وقتما قلتي من الهم الله يخلف
يزيد شوية…
أش نساك ؟راها غير دنيا
كلما كبرت فيك….
ضاقت عليا !!!
فينك أ سوايع الهنا؟؟
ملي كانت النفس بالقليل
قانعة و راضية !!
عييتيني يا دنيا…
ملي زهدت فيك جريتي ورايا
غير فرحت بيك و آمنت ليك
سرقتي مني راحتي و هنايا…
كنت نعطي بلا حساب
من جود الله عليا…
نعطي ضحكة و فرحة
و ما نبخل باللي معايا…
حيت ما طمعت فيك
ما تسنيت منك هدايا..
ملي دخلتي قلبي…
عمرتيه وسواس و ظنون و نوايا…
مليتي بالدموع صباحي و مسايا
و الضحكة وليت نخاف عليها
نخاف نعطيها…
آه منك يا دنيا…الى ضحكتي
تضحكي غير شفاية…
من رخصك..نشروك غالية…
يتبعوك بعينين مغمضين
واش ماعرفوك فانية؟؟…
مايلقاك غير اللي عطاك بظهرو
و عرفك أش ساوية…
آه منك يا دنيا…ملي تبكي
حد ما يعرفك علياش ناوية !!!!
قلبي خلي رجاك فالله وحده
و لا تحزنك ولا تفرحك الدنيا
ما دامت لغيري.. ما غادي تدوم ليا
غدا تلقا الحساب… اوا غير عمر النية…
الخير عمرو ما يضيع و الرزق ما هو بايديا
دوز ايامك بالبسمة راها كيما درتي غادية
علاش تبكي و المكتوب مسطر الحياة غير طريق ماشي مقر
و الى ضاقت بيك لقاها بالصبر
و دعي يكون ثوابك بالجنان العالية.